…..وليه معرفش
فى عز البرد ليه حًران
وليه غضبان
وقلبي ليه رفع رايه
هنا العصيان
وبسأل ليه بكون زاهد
وأكون زهقان
وأحوالي بتتبدل
وجوة القلب شوق عطشان
وأحلامي محوطاني
حدودها ناسيه عنواني
وتاهت جوة أوطاني،
ليه ساعه الحظ نسياني
يا ريت تسمعني أحزاني 😥
يا ريت تسمعني أحزاني 😔
……..وتنساني
ويجي ربيعي من تاني
يزور بالحب بستاني
ويجَمل سطور العمر
ويفرد ضله فوق داري
يا نبض القلب ما تداري
مانا داري بألامي
وحاسس بيها قدامي
وبحلم حلم مش ليا
يا قلبي وكل ما فيا
أنا ندمان علي كُوني
أنا إنسان
…….وليه معرفش
عيون الشمس دبلانه
وتبعت لي كلام بالهمس
ولو بصيت علي النني
بتوه وألمس جفوني لمس
وليه ديما بكون سامع
صراخ الفَجر
بيتوجع وبينازع وقلب الليل
ملان بالفُجر
بيتغمز ويتباهي بسواد قلبه
دا من غلبه بكي من الهجر
…وليه معرفش
حياتي صوتها مش واضح
حبال أنغامها ضعفانه
وجلد العمر ليه فاضح
وشكل البشرة نعسانه
وميت عقدة فوق التجاعيد
هموم بتزيد
كتير تفاصيل بتتزاحم
وتتغير ملامحها
بتبعد ليه وتتاخر
ويجي الهم مطراحها
وفين الرحمه مش فاهم
دا أقرب إيد بتجرحنا
وبينا الحب ليه راحل
ما كان هو دوا روحنا
وبلسم بيه بنتفاخر
…..وليه معرفش
في وسط الهم المتلبد
فى حشايا الروح
باستفسر ليه الشوق سارح
وأزاي بيروح
وأزاي بيعسعس عن حاله
وبيسأل إيه اللي جراله
بيعطر روحه بأحضانه
ونسيمه يفوح
وف نفس اللحظه بيتغرب
ويفوتنا ننوح
……….ودا ليه معرفش
…….. ………. ……..
بقلم / هدي النحاس
مجلة نداء الرؤح لفرسان الكلمات 