( عيني عليك يا ولد ) :
عيني عليك يا ولد
ياللي الزمان ذَلَّك
الأم زهدت فيك
حتى ابوك مَلَّك
وكان تراب الارض
احن منهم عليك
وبقيت تنام في الخلا
صار الرصيف خِلَّك
بالليل تِعِد النجوم
مستني ييجي الفجر
والصبح بدري تقوم
حلمان بليلة القدر
شايل يا عيني هموم
تِكِل منها الجبال
والله يا عيب الشوم
يكون طباعنا الغدر
عيني عليك م الأسى
والهم وايامه
وغُلب ما يتنسى
والليل واوهامه
واللي تباته المسا
بكره بتصبح فيه
وتقول لعل وعسى
تنساني آلامه
عيني عليك م العذاب
بدري عليك بدري
السهم منك صاب
والعمر بيك يجري
صابر والصبر طال
هل يا ترى مُمكِن ؟
تتغير الأحوال
جايز ومين يدري ؟
بقلمي الشاعر جمال زكي عينر
٣٣
٦ تعليقات
أعجبني
تعليق
مجلة نداء الرؤح لفرسان الكلمات 