( راح امشي ) :
راح امشي واروح بلِا عَوْدَه
هعيش مع خلق مِتهاوده
زهقت من المعاش مع ناس
تجيلها عدل تروح حَاوده
راح امشي واروح بلاد تانيه
هلِف واعِس في الدنيا
لحد ما الاقي راحتي ف يوم
ومش بحسبها بالثانيه
زهقت وتهت م الحيره
من الأصحاب وم الجيره
من الحكايات وقلنا وقال
وحقد ووسوسه وغيره
حاولت كتير اكون بينهم
وأبقى ف يوم واحد منهم
لقيت الكدب والبهتان
لقيت ديني خلاف دينهم
وأنا ما اعرفش ألف وأدور
بشوف الظلم دمى يفور
وقلت أَغَيَّر العتبه
وابدِّل ضلمتي بالنور
ياربي يارب هذا الكون
بتحرسني منين ما بكون
عليك أنا سندي وتُكالي
ودايماً إنت لي في العون
عليك أنا سندي وتكالي
ودايماً إنت لي في العون
بقلمي الشاعر جمال زكي عينر
أعجبني
تعليق
مجلة نداء الرؤح لفرسان الكلمات 