كي توحشتك
( قصيد بالعامية التونسية )
هانا جينا ليوم سبقنا
لبرك و أنت ناديتينا
كي قلتي تعالا تفقدنا
عزمنا و هجرنا برارينا
واميتي فرحنا و سعدنا
و الريح نفخ مواتينا
شدينا حبالك و جبدنا
نحسابو نهرك يروينا
كي تعرّيتي هانا لبدنا
كل واحد شادد تركينة
وينا ترابك لي لمدنا
وينا عطفك لي يسقينا
وينا كتفك لي يسندنا
وينا حليبك لي يروينا
ياما سعينا ما ترددنا
و الود سكن قوافينا
ليوم هاهو التركي جابدنا
ناوي باش يتحكم فينا
يجسّ و يرشي في قواعدنا
مشايخ نصبولا ماكينا
ما تخافش مانا تواعدنا
لا نخلوك و لا تخلينا
و هجم عليهم قايدنا
أما الذيب يقانص فينا
لابد في الشعبة مهددنا
في القبة نثر عراجينا
قلنالا اذهب .. فددنا
كشخ و جبد فكارينا
احنا ليوم عليه بعدنا
أما هو يتبع فينا
كي رخينا زاد عبدنا
لازماتا تقليعة بنينا
ديقاج رانا تعودنا
حتى تراويحا مسكينا
هانا جينا ليوم سبقنا
لبرك و أنت ناديتينا
نرجع توا للي كوتني
نعشقها و هي خلتني
كثر الموج مشت جفتني
عايش فيها أما سبتني
لعبت بقوتي و حطتني
تحت السباط و معستني
قداش نعدي وعدتني
في مسرب ظلما شدتني
لخاين هاهو زاد نعتني
مهبول و هي شبحتني
عصفور نفرفط ردتني
عالمشوى زادت قلبتني
في صحن الخاين حطتني
زود بالشوكة فتفتني
لحمامة طارت خلتني
نتوجع و الي غاظتني
ريدي نست و ما فقدتني
الأمم لكلّ جبدتني
درست موضوعي و نصرتني
كي نادت هاهي صحتني
نحلم بيها كي شدتني
سحابات لفوق و عدتني
مكة و القدس ورتني
مدن العُرْب لكلّ جتني
باسم الاسلام و حيّتني
رحلة في غمضة داوتني
من ظلم سنين الي كوتني
ستاقدت و زادت عجبتني
بلادي لا خانت لا نستني
أنا بلادي كي حبّتني
في سماها هاهي سمّتني
هانا جينا ليوم سبقنا
لبرك و أنت ناديتينا
فقت و طار عليا النوم
و بديت نفسر و نلوم
زعما منهو لي مظلوم
هاني في الأمّة مصدوم
لي عدا طولا في العوم
لا تكيدا بحور و لا هموم
حكيت لولدي عالسلوم
و الخاين وقتا معلوم
يصلي و يزكي و يصوم
خاين وطنا لا ما يدوم
تبع الغرزة يا فهيم
لا سحر و لاهو تنجيم
أخطى الخلق و كون كريم
لا تظلم لا تبات بضيم
امشي خطك مستقيم
الواحد راهو بيك عليم
و حتى لكل يولي خصيم
أنت اثبت كون حكيم
كي تزها افرح و اتبسم
فك حروفك و الطلاسم
لا تتكدر لا تتأزم
كل خير عليدك يتجسم
وطنك كي تسعى يتقدم
بالحكمة انطق و اتكلم
و الحكمة موشي كي تحكم
لحكمة كي ديما تتعلم
لا تتشكى و لا تتظلّم
سقم شورك ديما و نظّم
لي تكسر راهو يترمم
مهم تكافح و تصمم
نصحتك و انت خيرك تمم
و صوابك ازرع و عمم
هانا جينا ليوم سبقنا
لبرك و أنت ناديتينا
اسعى يا ولدي و اشهدها
أيام مريرة عدينا
و اكتب في دفتر عددها
جمرات تحطت في يدينا
و كلماتي ديما رددها
و ارجع ديما لموانينا
نفسك مالخير ورّدها
احنا الشر ما يواتينا
لغيبة ولدي ما تجبدها
لفحل يغيّب و يجينا
كي الظلمة يكثر أسودها
سمّي و زوّد تو تلاقينا
نار الكره ديما اخمدها
لمودة راهي تصفينا
صفي نفسك ديما اجبدها
و اتكّى ديما محاذينا
لميمة تفقد مسندها
هانا كي كبرنا حسينا
كنوز الدنيا ما تسعدها
غير ضحكة منك تكفينا
كي تنصح راك تعاندها
لمنية نهزك يا لحنينة
نطوّف بيك و نعاودها
مكة راهي ترحّب بينا
بيت الله الي قاصدها
و نزورو زادا المدينة
يا ربي حلمة و اشهدها
و بالقدرة تكتبها لينا
أمي تفرح كيف ولدها
يكتب فيها كلمة زينا
و أنا شاعر و نرددها
لُمْ و تونس في جواجينا
هانا جينا ليوم سبقنا
لبرك و أنت ناديتينا
هاني جيت نململ فيها
ملّة بالعود نزهيها
بالحرف نحرك مشهدها
و بالورد نزهي سوانيها
نكتب عبلادي ننصفها
و الناقة تخش صحاريها
هاني جيت ليوم نراها
فارس نلهد في براريها
نحفر حتى نشد ثراها
وردة فاحت في بواديها
و المدينة ما نجفاها
سيارة تدرز نبغيها
عالمها يرفرف في سماها
و الوديان تهرهر فيها
على راس افريقيا علاها
يا ربي تحفظ لي فيها
أنت راك قادر ترعاها
و تنمّي كل شيء عليها
خضرا صدق الي سماها
يا ربي كمّل جليها
غمامة تعدت فوق سماها
يا مطر صبّي و زيديها
يا ربي سهّل مجراها
ها السفينة بلي فيها
حلمة و نفسر معناها
و بالشعر هاني مسّديها
جدادة ليوم كبسناها
و السدوة تونس نبغيها
ريحة تونس يا مبهاها
البرنوس العربي مواتيها
تبختر في الجبة تلقاها
عنقر كبوسك و احميها
هانا جينا ليوم سبقنا
لبرك و أنت ناديتينا
الهاشمي البلعزي
في
18/04/2022
أعجبني
تعليق
مجلة نداء الرؤح لفرسان الكلمات 