بين الماضي و الحاضر
( قصيد بالعامية التونسية )
لماضي تنحنح قال عجبّ
لا فهمت و لا لقيت سبب
علاش الحاضر فيّا يسبّ
و أنا الأصل و منّي شربّ
كي راني مسطّر في كتب
ترهوج و تبهذل و تكبّ
*****
لحاضر قلّا شوف مليح
أنا نطوّر و انت تطيح
في الجوّ عامل شبّيح
صناعي قمري ما يميح
النات نسابق بيه الريح
نصلّح فأغلاطك تصليح
*****
لماضي تغشش و استشاط
قال أنا منك نحطاط
أنت راك برشا عيّاط
غشير و حاطك في قماط
و كانك تمشي عالسراط
ما اتبع كمشا ارهاط
*****
لحاضر متغشش مقهور
في مُخَا سكن الغرور
جيلي شققتا لبحور
نغيّر حتى في الدستور
في عصري هاو عمّ النور
هزوا عليّا ها المسحور
*****
لحاضر تنفض كيف جريدة
شدّا القاضف و التنهيدة
قال كانت لمّة و سعيدة
لفارس ما يخلّ مواعيدا
لميمة فحلة و صنديدة
و البابا عُكازا فيدا
*****
لحاضر من طبعا رمّاش
جايب مُصلي و حشاش
قلهم خُشُوا في النقاش
كل واحد يسهل وعلاش
تحالو الزوز عالمعاش
لتوا ما تمّ النقاش
*****
ادَخِلْت و نعرف لثنين
الماضي عاقل و رزين
و الحاضر فاهم و فطين
قلتلهم نحكوا باللين
كل واحد في عصرا ثمين
و انتم اخوة باسم الدين
*****
و اتلمو الحاضر و الماضي
كل واحد يمدح و يراضي
كل واحد في خوه يحاضي
لا واحد في خوه يقاضي
عملوا محفل استعراضي
لمّة ما مشتشي عالفاضي
الهاشمي البلعزي
في
19/04/2022
أعجبني
تعليق
مجلة نداء الرؤح لفرسان الكلمات 