( أم الشهيد ) :
{وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ}
( أم الشهيد ) :
جاني الخبر وقالولي مات
مات شهيد
رحت وجريت لقيته هوه
إبني الوحيد
أيوه فعلاً خبر أكيد
أيوه إبني مات شهيد
مات راجل وكان فارد جناحه
مات وكان حاضن سلاحه
يبقى ليه تقولولي مات ؟
قولولي قومي يا أم الشهيد
فرقي الشربات
وزغرتي ده ابنك شهيد
وع الشهيد ما نقولش مات
بس ما أنكرش
إن بفراقه حبيبي ضهري انكسر
وإن قلبي بين ضلوعي إنكوى واتحسر
وافتكرت ايام ما كان بينام في حضني
إبني ضنايا اللي شلته شهور في بطني
اللي كان النوم ناسيني
ويجافيني لما يتعب
وعمر ما يهنالي يومي
إلا لما يقوم ويلعب
ما انتوا عارفين الفراق
قد ايه بيبقى صعب
وإن اقوى انواع الجراح
الجرح لما يكون في القلب
هو فيه في الدنيا غالي بعد الضنا
اللي عشانه شعرى شاب وضهري انحنى
بس هو حبيب عيوني
ما انحناش
كان راجل وبروحه ضحى
وراح ما جاش
إبني الوحيد
وكل ولاد بلدنا كمان معاه
مش حيغلوا عليكي يا مصر
ده انتي منحة من الإله
ام الدنيا لكل عصر
إبني ما ماتش
إبني شهيد
والشهيد في الجنة حي
واما دفنته أنا بايديه
كان وشه وسط الضلمة ضي
إبني حبيبي لسه عايش
إبني مش رايح يودع
ده لسه جي وجي وجي
إبني مش رايح يودع
ده لسه جي وجي وجي
بقلم الشاعر جمال زكي عينر
١١
مجلة نداء الرؤح لفرسان الكلمات 