( آخر مشهد ) :
إمتى نشوف بقى مشهد تاني ؟
فيه الدنيا بمنظر تاني
مشهد فيه الدنيا بتضحك
مشهد ابدد بيه احزاني
قالوا كتير عن نفس المشهد
وانا جه دوري أقِر واشهد
نفس المشهد بيعيد نفسه
كلاكيت ولا ميت الف ومرة
نفس المشهد هو بنفسه
نفس الجُرعة ونفس الجَرَّة
إمتى يارب ندوق الحلوة ؟
إتجَرَّعنا كتير م المُرَّة
نفس المشهد شفناه كتير
نفس الدور نفس الإخراج
حاولوا كتير يلاقوله تفسير
علشان يهربوا م الإحراج
لكن ربك له تدبير
بعد السجن أكيد إفراج
مشهد كل الناس عارفينه
حتى الدور والله حافظينه
مهما يغيروا في التفاصيل
صعب يغيروا ارضُه وطينُه
مشهد مرسوم في الكراس
ملِّت منه خلاص الناس
عايزين مشهد مرة جديد
بس يكون معمول له اساس
مشهد لازم يبقى له حد
بعد السبت بييجي الحد
كل بداية وليها نهاية
بعد الفوضى اكيد فيه جد
وعشان نرسم مشهد تاني
مش عايزين ولا حد اناني
لازم تبقى الإيد في الإيد
نتعب حبة كمان ونعاني
حبة بحبة حتيجي الفرحة
زي عروسة ولابسة الطرحة
مصر بلدنا اكيد محروسة
وحتسلم م الإيد الجارحة
حتعدي الازمة وهتروح
حتى ولو حتصيبنا جروح
والصورة الحلوة حتتجدد
وعن فرحتنا العالم يشهد
وتعود البسمة على وجوهنا
وبكده يبقى ده آخر مشهد
وبكده يبقى ده آخر مشهد
بقلمي الشاعر جمال زكي عينر
١١
تعليقان
أعجبني
تعليق
مجلة نداء الرؤح لفرسان الكلمات 