……. بلاه العشـــــــق ياولدى ……….
وقالتلى
بلاه العشق ياولدى
وقلت ليه يامايَه
قالتلى مر وعلقم
وألمه بألف حدايه
وقلت العشق مش بالكيف
قالتلى صح ياولدى
وخاف منــه كحد السيف
ساعات الفرح فيه بتطير
وألمه مر وحكايه
ولو مكتوب عليك تعشق
يعين الله على الغايه
جماله ان يبقى بجد
ومش ضحكه ولهايه
ولو عشقك صحيح هيكون
يكون جوه القلوب رايه
بترفعها بوسط الناس
وكون كتله من الاحساس
وخد بالك ولاد الناس
لاهى لعبه ولا روايه
وماتت امى او رحلت
ولسه كلامها بودانى
بقيت اعشق اوى ياامايه
وبرجع تانى وحـــدانى
وعشقى زى ماقولتى
الاقى الدنيا وخــدانى
وبعشق مهما كان عشقى
تروح منى لنفــر تانى
وابات أبكى على حالى
وحالى صعب وانانى
واهى الدنيا كما قولتى
مفيش راحة ولهايه
واما اليوم انامجروح
بحس بخوف مكان مابروح
وجرحى حابسه جوايا
مرار المر بات حلقى
وعشق اليوم طهق خُلقى
اذا بعشق بنات اليوم
رابع ليله يكون اللوم
وبعد شهـر بنهايه
اشى يعنى ناقصها جواز
اهـــم شىء ب جيبى المال
ولو حتى ببيــــــــع الجاز
هلاقى كتير وشـرايه
ولو كنت عميد جامعه
فقير الحال على ادى
بكون كداب وابولمـــعه
وسارق قيمـتى وشهادتى
ولو عايش بنار ولعه
ولو دمعى على خدى
الاقى الاخ يتركـنى
واكون مكروة من الـدايه
ومات العشق من عشقى
وقلبى حبسته جوايا
تعالى بحضنى ياغاليه
تعالى بحلم يامايًه
انا دمعى على خدى
معدش له ولا نهايه
كأن الكون رحل زيك
وسابنى للحياه زيك
وناسه كتير ورغايه
……….. احمد عامر ………….
ننوه ان ماينشر حق فكرى مسجل بالهيئات المنوطه بذلك 6648105/2016 س م ب
٩٩
١٦ تعليقًا
٣٠ مشاركة
أعجبني
تعليق
مشاركة
مجلة نداء الرؤح لفرسان الكلمات 