عايز احكى لكم عن اهم يوم فـِ عمرى
يوم ما مُت ..
يومها قُمت الصبح بدرى
على صوت رنة ع الماسنجر
– ايوه صباح الخير يا امى .
= ايوه يـَ ابنى .. شهر و اكتر مش بتظهر ..
افتح الكاميرا واحشنى ..
حتى اشوفك ع الازاز
– طب يا امى .. بس الشغل اللى طارِشنى ..
سامحينى يـَ اعز العزاز ..
معلش يـَ اما مضطر اقفل
اصل جرس الباب بيضرب .
– ايوة .. مين ؟
= شقة الاستاذ امين ؟
فيه جواب م المحكمة
بس امضى تحت ع اليمين
= ايه يا بابا .. مين ده هو ؟
– جواب ميعاد جلسة اخويا
بتاع قضية الميراث ..
و الله ما هـَ اسيبه الا اما اخد حقى منه
و جيه على كعب الجزمة باس .
= طب يا بابا ..
ماما بتقول لك اوعى تنزل
قبل ما تسيب الفلوس
عايزة تجيب اكل النهاردة و الدروس .
– انتو مافيش فوق لسانكم
غير بس كلمة هات و ادفع ..
هو ايه .. ؟
ابوكم ده حمار عجوز ركبوه فـِ مطلع !
= ايه يا راجل !
كل يوم لازم تزعق للعيال ؟
اول ما تيجى سيرة الفلوس
تتحط كدا و تتشال !
يللا انزل شوف مصالحك
و انت ماشى ابقى عدى لو مرة صلى
مِن امتى ما ركعتهاش .
يوم طويييييل ..
بس عدى بسرعة خالص
ما بين مناهدة و بين خناق
ما بين امى اللى ما قدرتش اشوفها
و سيبتها فـِ الاشتياق
ما بين فلوس جمعتها
م اعرفش ان كان فيها الدوا
ولا منها الداء ؟
فات اليوم ..
تعبت ..
نمت ..
الصبح قمت ؟ .. لا ما قمتش
لقيتنى طاير فوق سما بيتنا
و شفتهم حوالين جسمى ملمومين
= كان لسة بدرى يا امين !
فجأة رُحت
– و كأنه كان طريق قصير منه فُت
و كأنى عشت عمرى كله ..
يوم ما مُت
بقلمى / وجيه كامل
٤ارق ملاك و٣ أشخاص آخرين
تعليقان
أعجبني
تعليق
إرسال
مجلة نداء الرؤح لفرسان الكلمات 