فكره
فى واحد حَبنا فكره
وواحد حَبنا استمتاع
وواحد حُبنا حياته
لكن عادى يبان بياع
وناس ملهيه فى ظروفها
تشوفها كتير وتعرفها
على وشهم باين..
ماكسبوش ياما أد ما ضاع
وناس احساسها يخجلها
يكبلها يلجمها
وناس لو تنطق الكلمه
ملامه ولوم عتاب ووداع
وناس تكتب حياة الناس
بيقفلوا باب مالوش ترباس
على حكيوه مرفوضه
ويخفوا كتير من الاحساس
فى خلق عيونها كما كاميرا
تصور حاجه تفهمها
ومليون صوره مش واضحه
تخبى حقيقه فى البرواز
وخلق عيونها شفافه
ومن جواها متشافه
تقابل خلق مش واضحه
ضميرها شروخ وعينها ازاز
وعالم عايشه مطفيه
عيونها عدسه سحريه
تشوف براها مهما تشوف
وجوه بلاوى منسيه
فى واحد حَبنا لظروف
وواحد حَبنا م الخوف
وواحد حَبنا حكايه
فى دنيا مش رومانسيه
وانا على هامش السيره
معدى هناك ماليش سيره
وبحكى ع اللى جوايا
وأفعالى بدون نيه
حياه بتسرقنا من روحنا
وتفتح ياما فى جروحنا
ونسأل حلمنا المنسى
لفين رايح يقول رحنا
واتارى فى دنية المشاوير
فى ناس عايشه بلا تأثير
وادينا فى هامش الرحله
بننسى نفسنا فى الغير
وننسى الحلم بعد الحلم
ونحلم ياما بالتغيير
يا خلق الخُلق مش ناقص
نسينا نحسنا خالص
ماحدش قدر المكتوب
وكله من الكمال ناقص
فى ناس ينقصها احساسها
وناس احساسها نَقصها
وناس بتحس لو نسكت
وناس بتحس بالعافيه
وادينا فى ساقية العيشه
بننسى نعيشها بالمره
وننسى نفسنا فى تفاصيل..
ناس غيرنا وناس غيرها
وفجأه بنصحى م التوهه
ونسأل ايه مغيرنا
نسينا عيوبنا فى عيوبهم
لحد ما عيبنا كبرنا
٢٧جعفر صادق شلال الحسني و٢٦ شخصًا آخر
٢٠
٩١
أعجبني
تعليق
مشاركة
مجلة نداء الرؤح لفرسان الكلمات 