…. انت مين ….
هي قالت عايزة منك كلمتين
كنت طول عمري عني فين
في الحلم رسم صورتك
حتي الرموش والعينين
جرأتك عيشتها جوا حلمي
قربت مني دوبتني بكلمتين
لقيت إيدي ماسكة إيدك
نسيت أسألك واخدني فين
عشت سنين حبك حلم
عشت الهوي والخصام والأنين
كل ليلة كنت هنا جنبي
تحكي وتتكلم عشقت مين
قبل مني بس أنا حب عمرك
تترمي ف حضني لما تكون حزين
تبكي وتحكي جوا صدري
زي أم ف حضنها طفل جنين
النهاردة لقيتك واقف قصادي
قلت حلم وهيعدي ف ثانيتين
عيني صاحية الدنيا زحمة
يبقي علم طب جه منين
ناديت عليك وعارفة إسمك
رديت بأدب حضرتك مين
قلت حبيبتك ياما حلمت بيك
ده أنت إمبارح كنت بين الإيدين
كنت جنبي قربت بوست خدي
قلتلك الأدب قلت أجيبه منين
لقيت شكلك راح ألف لون
قلت مش عارفني بتقوللي مين
أنت حب عمري أنت حلمي
إللي عشت معاه طول السنين
ياخسارة مزورتش مرة حلمك
معشتنيش ف الخيال ولو يومين
بعدت عني ومشيت بعيد
سكت وانت بتغيب عالعينين
تهت وسط الناس في لحظة
مجريتش أسأل حتي رحت فين
ليلي جاي وحلمي جاي معاك
هتعتذر وهسامحك ف دقيقتين
مش مهم أكون غريبة في الحقيقة
المهم إني حبيبتك وطنك والحنين
جوا حلم هتفضل جنب قلبي
ياحلم الحياه بفرحها والأنين
حبيبي عايزة أقولك بس كلمة
لو قابلتك في الحقيقة أقولك يامين؟
….أيمن بلال ….
مجلة نداء الرؤح لفرسان الكلمات 