*شمس الكون*
تدور الشمس فى مجره تدور الأرض وياها بالمره
ويتشعبط فى نور الشمس كام كوكب وهى نفسها تهرب
تدور من تانى وتقرب عشان تشرق على وجهك كمان مره
***
وهى فاكرة الدفا فيكى وفاكره الضى فى عنيكى
وفاكرة ان انتى شمس الكون وبتدُور هى حواليكى
وفاكرة ان انتى احلى نهار فتضحكلك وجواها نار
ولما بتختفى منها بتفتكر ان جا ليلها
فتبكى وتشتكى الضلمه وتسأل عن ملاك نايمه
وأنتى ملاااااك ومش انسيه بالمره.
***
وفاكره ان انتى اللى مدالها شعاع النور
وفاكرة الزرقه فى عنيكى بحور وبحور
وفاكرة ان انتى لونتى الكريز الوانه بشفايك
ومديه الورود أساميها من اسمك
ومديه العسل طعمه ومديه الجمال اسمه
ومديه الطيور جناحاااات تعيش حره
وانتى ملااااااك ومش انسيه بالمره
***
وفاكرة ان انتى نجم جديد ومين يلاقيه وليها نظريه فى تكوينك وبتقول ايه
قمر فرحاااان وكان عنده من العسل جره تقع منه وينتشر العسل بره
ويملا الكووون يزيد يكتر
ويتلم العسل فيكى من جاذبية السكر
وتتكون خدودك الحمر من عناقيد عنب احمر
يدوب الشهد فى شفايفك يدوق منها الكريز يسكر
وينصهر الدهب ويدوب يلون شعرك الأصفر
ويتخلق القمر منك بيضحك ليكى وبيسهر
قمر سهراااان وسرحان فيكى بيفكر
وتتكثف بلاسم ناعمه على جلدك واحساسك
وعطر الورد انفاسك ونفس الورد لو باسك ولو مرة
وانتى ملااااااك ومش انسيه بالمره
محمد شمس
أعجبني
تعليق
إرسال
مجلة نداء الرؤح لفرسان الكلمات 