(عامية مصرية)
بقلمي/ أشرف محمد السيد
“”””””””””””””””””””””””””””””””””””””
**التعبانة**
(عامية مصرية)
بقلمي/ أشرف محمد السيد
“”””””””””””””””””””””””””””””””””””””
التَعْبانة قُوم رَيَحْها
إديها من فَضلة خيرك
عِيب تشتمها أو تجرحها*
التَعبانة شايلة هُمومها
فَقر معَّشِش جوا هدومها
تشقي على ولادها ومش طايلة
تاخُد راحة وراحتك نومها*
التعبانة اُمك بنتك
عايشة ف بيتك ماشية ف ديرتك
راضية وصابرة ع إللى معاها
رجولتها بتحرك غيرتك*
التَعبانة اَرض عفية
تزرع تقلع اِيدها قوية
تبكي وتضحك وقت الشدة
مش فاضية لِلعبْ وتسلية*
التَعبانة جيل متعلم
عندوا شهادة وبيتألم
جاهل ماسك ف البزازة
يشفُط ويبطرخ ويعلم*
التعبانة عقل وروح
تضعف تِقوي تيجي تروح
يوم بتعاند يوم بتطاطي
تحت الظلم أنين وجروح*
التَعبانة ف السلخانة
لحم مرطرط خوف وإهانة
عايزة تعدي لازم تدي
ياما دياب هايجة وسعرانة*
يا تَعبانة تعبتي قُلوبنا
دوبناكِ وبعدين دُوبنا
رَبك رازق هو العاطي
وانا بدعيلك سيبي جُيوبنا*
تعبانة ومش عيانة
عندي عنين شاهدة ومليانة
خلي الدعوة لغيري ويمكن
ربك يهدي قلوب حيرانة*
“”””””””””””””””” بقلمي/
أشرف الشاعر أمير القوافي
٢ارق ملاك وشخص آخر
تعليقان
أعجبني
تعليق
إرسال
مجلة نداء الرؤح لفرسان الكلمات 