********************************************
==========– ح اكسر قزاز النظارات
********************************************
ح اكسر ازاز النظارات
ولا اشوفش كوم حزن فى عينيكى
واسأل ليه؟
يقول معرفش
ولا اشوف انكسار انتظار عقيم ما بيرحش
انتى اللى شوقى اليكى ما بيموتش
ويفتح للحياة باب ما يقفلش
لسه فيه فى عينيكى شىء برىء بيندهلى
كل ما ابرد دفاه بيرجعلى
الصوت بعيد
والصدى ساكن بيسمعلى
انا اللى عشت العمر بروح
هربانه من جهلى
كنت افتكر عشقك شىء سهلى
كنت افتكر افك سرى لما عينيكى تندهلى
على مهلى
اخطى للفراق وكل خطوة توجعنى
اركب حصان الوجع
يرفص ما يشفعلى
انتى اللى لما اتوه صوتك يرجعنى
يا اما الضفاير احلامها جناحات بترفعنى
مدى ايديكى
مش كل ايد تطبطب تريحنى
ورغم انى عارف
ان الامل مش احتمال
وعارف ان اللقا هو الخيال
و ابص من سور قصورك محال
لكنى واقف بانتظر معجزة
و صورتك فى قلبى متبروزة
رغم الوجع بالملم حروف رسايلك
واتمنى جائزه
يا حب ما مات منه حتى الصدى
ياحزن وردة فارقها الندى
عمرى بالجرح ابتدى
وحلمى بالحزن انتهى
ماشى بادور على دبلتين فى الحصى
مكسورة فيا غتوتى
والموج بيرمينى لاخر مدى
=======محمد عبد المقصود داود====
أعجبني
تعليق
إرسال
مجلة نداء الرؤح لفرسان الكلمات 