ناااااس و ناااااس
عامية مصرية
بقلمي 
أشرف محمد السيد
“””””””””””””””””””””””””””‘””””””””””
قصيدة 
ناااااس و ناااااس
عامية مصرية
بقلمي أشرف محمد السيد
“””””””””””””””””””””””””””‘””””””””””
☆ ناس تحاسب ، ناس بتاكل
ناس توكل ، ناس تواكل
ناس تقلب ف الدفاتر
زرعها هم و مشاكل
☆ ناس تذاكر كل يوم
يوم بتفطر ، يوم تصوم
ريحة الصبر ف هدومها
و لإوِر يحسد ، يلوم
☆ ناس تبيع ، ما بتشتريش
ديك مفرهد ، كله ريش
يبلف الفرخة بصياحوا
وإن راحتلوا يقول مفيش
☆ ناس بتركع للفلوس
لجل جزمة تروح تبوس
وإن عاتبته، يقولوا ناصح
والبعيد ، نطع و جاموس
☆ السفر ، خلى البهيمة
يبني قصر ، وطين و خيمة
و المثقف فى بلدنا
العبيط يهريه شتيمة
☆ حمرا ، قرعة، حظي فيها
و التراب حاطط عليها
جايز البطيخ يخرخش
لجل ادوقها ، هشتريها
☆ ناس عكاوى، ناس كلاوى
تخترع ظلم و فتاوى
يوم يزمر ، يوم يحمَّر
فقري ، زابط ع البلاوى
☆ دنيا من ناسي و ناسك
و الغلط داسني و داسك
الأصول ، قالت نعزل
باس عمامتك ، خد لباسك
☆ شاب ف الزحمة و شايب
فهم ناقص ، حلم خايب
والحليب م الركنة يحمض
يعملوه ف القربة رايب
☆ الحياة ، عيشة و تعدي
يوم بتجري، ويوم تهدي
و الخلاصة ، الكل رايح
كان كابوس، أو حلم وردي
“””””””””””””””””” بقلمي
أشرف محمد السيد
كل التفاعلات:
١٩Ashraf Mohamed Elsayed، والأديب امين ابو عياش و١٧ شخصًا آخر
مجلة نداء الرؤح لفرسان الكلمات 