================- كان نفسى اقولك عام جديد ***************************************************
كان نفسى اقوللك عام جديد
واخرج من الليل لاحلى عيد
عيدهوانا
عيد ما تمحيه السنين
حبه مشاعر اتكونت كما الجنين
صعب ننسى وصعب نتقابل
احلام بتتقاتل
صعب القلوب تتنازل
كان نفسى اقوللك ونتفاءل
لكن دروبنا اتغيرت والمعطيات اتبدلت
دلوقت ممكن تعيشى حبك فى القصيدة
وحلم وانتى بعيدة
صورة شعرية عنيدة
بيتك وصعب نقصه قص
تفاصيل تخنق حروف النص
الوقت ما بيغير حس
وصعب الخروج عن نص
الحب مش قصه ومقاله
الحب حالة
وساعات نرحل ونسيب رساله
الروح بتدندن للاشجار العش
اللى فى راسه كتير اسرار
وعصافير بتلم عشاها من عفار النهار
انا عارف ح تقولى لقانا حرام
للعش قانون
يمنع جناحاتى تطير
برا فى اى مدار
بس انا روحى فى الليل بتسيب روحى
وتجرى على روح ساكنة فى روحى
لا بتعرف قوانين ولا اسوار
والقلب لسه عطشان لحنان
يحلم والحلم فى زمانا جنان
يصحى على صوت من جوا الوجدان
يزلزل كل الاركان
مش يعنى كنتى تفجرى البركان
قبل ما تمدى كلام يخنق نبضى الحيران
قبل ما تدقى البيبان
وتقفلى بيبان
قبل ما قلبى ينفطر وينشطر
والخريف يسمع من بعيد صوت مطر
—————————محمد عبدالمقصودداود
كل التفاعلات:
٢ارق ملاك وMansour Benmansour
مجلة نداء الرؤح لفرسان الكلمات 