==============- آه يا زمان غريب === ######################################
آه يازمن غريب
كان لينا وراح من ايدينا
ما صبح يخاصمنا او يلاغينا
نموت فى المدن الغريبه
والسفن تنزل دموعنا فى كل مينا
ويكتبوا اسامينا فى الكتب القديمة
ويقولوا عنا حكايات اليمه
تقف البنات ع الشطوط
تمشط شعورها خطوط خطوط
خط قايل للسقوط
وخط تايهه بين كل الحظوظ
ونموت بخوفنا جوا البيوت
وعينينا تشكى عجزنا وقلة حيلة
تسرق حلاوه عمرنا
من لحظة ميلادنا
لحد ما الناعى ينده علينا
و نموت والحلم خانق كل همسه فى العيون
وقافل شبابيك كل فرحه فى الجفون
تنقطع اوتار الكمان وتموت
ويموت الكلام من طول السكوت
وما يبقى لنا فى الدنيا صوت
فما تفكروش تحلموا الا بتابوت
ونموت فى المدن البعيدة
ويلملموا احلامنا من على حروف طرف القصيدة
ويوزعوها صدقات على الصبايا
قبل ما تشيب وتبيع ستايرها الجديدة
وينادى منادى كل ليله شتا
يصحى اوجاع حبنا ترسم ليالينا
ملامح حزننا فنموت فى المدن القريبة
وتجرحنا دموع بتسطر حكايات كئيبة
عن الاقداروالظروف واشياء مريبة
ونموت فى الشطوط البعيدة
ولسه فى وجوه البشر ملامحنا السعيدة
بااشوف فى عينيكى نظرة عشمانه
تحكى عن الزمن اللى راح
و قلوبنا بالامل مليانه
وانا عارف ان قلبك بخيره وحنانه
لانى شايفك ملاك مش بس انسانه
فبلاش تعيد الكلام
وتقدمى ميت عرض
انتى الحياة والامل والسما والارض
انتى البحور والشطوط
وانتى اللى مالكه القلب من غير شروط
================محمد عبد المقصود داود
كل التفاعلات:
١Mansour Benmansour
مجلة نداء الرؤح لفرسان الكلمات 