بقلم: محمد دومو
-مراكش/ المغرب
( زجل مغربي )
مول لعناية ما يحير!
( زجل مغربي )
المشتاق ال لحلاوة ذاق
تغير الزمان عليه وفاق
الشجرة ف لخريف ساست لوراق
هذا تغيير.. ما كان ف لحساب
والهجر ملزوم ال كل ناقم ومحساد
ناس بحال لحمامة تقلد لغراب
أخايت عل المشتاق إلا ذاق
مول لعناية ما يمكن يحير
ما يتملق ولا يتيه ف الطريق
يصبر عل ليام معذب ولبيق
راه تنساو فزمانا أهل القاع والباع
عيش شريف وكون وافي
ولا تقلد منطيح يكويك بلعوافي
وبلا طمع يغرق السفينة
جهد التقداف لي ينفع ما يضيع
عايش بالمرار يتلذذ ويداري
ذاك صاحب الهمة الشان
وعيون الشفاية تخبر وتسول
ما يبوح بشكاوي ولا يطيع
-بقلم: محمد دومو
-مراكش/ المغرب
مجلة نداء الرؤح لفرسان الكلمات 