عامية مصرية
بقلمي 
أشرف محمد السيد
“”””””””””””””””””””””””””””””””””””””””””””””””””””
قصيدة 
طبهار بلدنا شرق و غرب
عامية مصرية
بقلمي أشرف محمد السيد
“”””””””””””””””””””””””””””””””””””””””””””””””””””
طبهار ، كتبتك بالعامية
علشان عيونك العسلية
بحب ليلك و نهارك
شمسك وضلك والعشرية
شرق و قبلة و تلت الحد
غرب وموقف ضحك وجد
أرضك و ريحة اشجارك
و اهو كل شئ ماشي بالود
طبهار دي قرية ف الفيوم
شمس وقمر وربيع ونجوم
تسهر و تحلم صبح و ليل
صابر و راضي بالمقسوم
لا انا جاى اطبل ولا اشاكل
واهدم حوار وابني مشاكل
أنا جاى أحط الايد ف الايد
يا ما ناس ،حقوقها بتتاكل
اُوزعة وطويل واخد نايب
حاضر بشخصه أو غايب
قالوا ، نطبل و نزمر
جايز نجيب نايبة و نايب
فرح و مولد متكلف
و ناس تبعزق و تسلف
أصيل بيحسب رايح فين
عبيط يهجص و يألف
قالوا عليك حسبة عجيبة
و كتير بيفرح بالخيبة
خليك رزين واستهدي اُمال
تمسح ف جوخ وتقول طيبة
حنطور و سايق عربية
شايل فلوسه ف جلبية
يفشر ويجرح خلق الله
واخد طريق الشضلية
إبن البلد قاعد ف النور
زينة و أدب بيشور ويزور
قالوا عليه فاضى وفاشل
يمكن يموت جايز هيغور
فين العلام فين التدريس
فين المحطة والاوتوبيس
واقف يقشط ف الراكب
ملعون وشاطر ف التدبيس
راجع انا أكشف و ادي
و المحترم بهديه ودي
أصل الجواب واضح مكشوف
و بالقلم هيكون ردي
أشرف وعارف شرق وغرب
شارع و حارة ، عزبة ودرب
بهددي النصيحة ، لاحبابي
مش بالزعيق ولا شتم وضرب
. سلام عليكم و علينا
بالحب ، بنمد ادينا
و إللي جاهلنا هيعرفنا
يمكن ياخدنا يعشينا
طبهاررسمتك ف كتابي
شيبتي و طفولتي وشبابي
نفسي أشوفك حلم كبير
وازرع بحرفي ف غيابي
,,,,,,,,,,,,,,,,,,,,,,,,, بقلمي
أشرف محمد السيد
كل التفاعلات:
٥٤Ashraf Mohamed Elsayed و٥٣ شخصًا آخر
مجلة نداء الرؤح لفرسان الكلمات 