====================== علمنى قلبك الجفا ==
—————————————-
علمى قلبى الجفا ..زى ما قلبك جفا
اخلعى الشوق اللى خانق كل نبضة
واللى عمره ما وفا
واكتبى شهادة وفاه
حررى قلبى من وجودك
واقفلى سجن الوفا
قلبى من ليل العذاب اكتفى
خلينى احررشويه من عمرى اللى باقى
انا المهزوم باشتياقى
انا المخنوق فى كل فرحة
فكى خناقى
قلبى مش ميدان حروبك اوسباق
كل نبضة قتلتى فيها الحياه
كل نبته خضرا فى روحى
ماتت احتراق
انا المرمى جنب خوفى
كل مُضغة مستنيه الانطلاق
قولى امتى انتصر واعلن رايات الانعتاق
قولى ان العجز صابنى
قولى ان الوهم صادنى
وان بيت الشعرما عاد هوالنجاه
وان بيتنا لما حلمنا ه
كان مصيره زى احلامنا وتاه
وان شعرى مش حصانى
وانى مش فاهم زمانى
وان دربى مش مقاس خطاكى
وان وردى ما كان هواكى
قولى تانى
قولى اكتر
متخفيش على دمعى يجرى
متخفيش على دبح عمرى
متخفيش على روحى البريئة
حررينى من سراب الحلم
قولى الحقيقة
–&&&&&———-محمد عبد المقصود داود——=======
مجلة نداء الرؤح لفرسان الكلمات 