-بقلم: محمد دومو
-مراكش/ المغرب
( زجل مغربي )
هايم ف البحر!
( زجل مغربي )
جبدت ورقة فنهار وقلم
فوغة ت اللهيب تكويني جمر
كلام يتكتب بالدموع والدم
والقلب يتألم
مجروح وموشوم
طاير فالسما هايم ويخمم
آش درت أنا يا ناس فالدنيا؟!
علاش حياتي كلها هم؟!
ما عرفت نجاوب!
ولا اقدرت نراوغ
لقلم هذا أصبح مجداف
وأنا غير هايم فهاذ البحر
ما كنت فنهار بحار
ولا اسبق ليا نعرف نعوم
توكلت عل الله
وسلمت أمري
يمكن نخرج سالم
ويمكن هنا نموت ليوم
كلشي بيد الله
وأنا كنقاوم هاذ اللحظة
ونطمن نفسي ونقاسي لمواج
وغذا يعلم الله على حالي
واش نكون فالدنيا
ولا نرحل عند لموات
المهم كتبت احساسي
وهاني باقي ساير كنعاني
-بقلم: محمد دومو
-مراكش/ المغرب
مجلة نداء الرؤح لفرسان الكلمات 