( زجل مغربي )-بقلم: محمد دومو
الحرف شريف!
( زجل مغربي )
يا عاشق الحرف
يا ذاك الݣوال
من خوكم المجدوب
راه ݣوال الحرف
ما يعيب ولا يبغض خوه
ولي فراسو الشك ولخميرة
يظن عند راسو سلطان
الحرف ما يمكن تحكمو
ولا تتسلطن عليه
ݣول ما عندك من لكلام
وخوي ال لاخر لمكان
خلي ميزان لودن يحكم
خوي مكانك وخلينا
من التعياب على ݣال هذا
ولاخر كيف ݣال
اطربنا إلى حاكم كلامك
وخلينا نحكمو
وبلا تاثير
ولا تسباق لعصى قبل من لغنم
وبلا ما تقيد عل لاخر لمقال
راه الفن كيبقى شريف
والفنان ما يبغض ولا يشمت ف خوه
هكذا تعلمنا مع الحرف شروطو
راه النظيم ما ملك حد
ولا سابقة ليه سلالة
والكره خصلة القندوح
ما تفيد ولا مزيانة
ولي تعلق بها
ضاع بوحو وطار
وأصبح عامر قلبو بالكره
وبالخوا واللغيط الخاوي
وتعكريطة النخوة والتبنيدة
وياك تحسب راسك شديد
ولا تغرك نفسك مع البوح
نوصيك تتواضع يا هذا
راه الݣوال ك يبقى بوهالي
مشطون غير بالرنة
نوصيك يا صاحبي
قيل عليك الناس
الحرف ما يمكن تخدعو
وما يحمل كل متسلطن مغرور
-بقلم: محمد دومو
-مراكش/ المغرب
أعجبني
تعليق
نسخ
مجلة نداء الرؤح لفرسان الكلمات 