( بيحبني ) : بقلم جمال زكي عينر

بيحبني بس معاند
وعامل انه مش واخد
في باله وانه مش عارف
بنظرة مني يتاخد
ودا كله عشان قال ايه
ما يدي الحب ولا ياخد

يا سيدي خلاص بلاش منك
ومش عايزين وداد منك
ده لو حبك ماجاش منك
ما احبش وانت مش رايد

بيحبني بس مكابر
وللخاطر ماهوش جابر
مع انه للهوى مشتاق
وعلى بعدي ماهوش صابر
باين عليه ف نظرة عينيه
وف لهفته لما باسافر
التقل ليه والعند ليه ؟
ليه في الغرام بقى بيعافر ؟

بيحبني مسيره حيجيني
ويقوللي يا حبيبي ارويني
اديني عطفك وحنانك
وريني حبك وريني
وحابقى على سابق عهدي
ومش راح اسقيه من صدي
لاني متأكد انه
بيحبني ورايد ودي

بقلمي الشاعر جمال زكي عينر