إضرب بعزمك يا قلم
حارب وقطع ف الألم
وأرسم وجع أم الشهيد
أحفر خطوط قلب اتظلم
عبي الورق قهر ودموع
…..مفهاش رجوع
خلي الطوفان يملي المكان
غرق وكسر فى البيبان
وأعمل حسابك تفتكر
……وجع الزمان
إضرب بعزمك يا قلم
حرر حروفك من أيادي الزور
إفتح طريقك طفي نار ف صدور
دا النار قويه فى قلب كل غيور
حول ضلامنا مرة واحدة ل نور
إضرب بعزمك يا قلم
حدد وَرَم عاش فى الطفوله
مَوت أماني كتير مَوت أمومه
موهومه يا أُمه بترمز للرجوله
مدفونه روحنا جوة صك معونه
ملعونه كسرة نفسنا
حتي الكسور مش قابله
تسكت ع الهموم
لازم نقوم ونقول ونحكي بعزمنا
راح الضنا راح الفؤاد
راحت معالم لاتحاد
والحزمه منا اتفككت
والوحدة غابت عننا
حتي العروبة اتلككت
مشغوله ديما بالبُعاد
أنا حاسه كل الكون جماد
مخنوقه أفعال العباد
العرض هان والدم هان
………حتي الوداد
فأصرخ بعزمك يا قلم
أرفع فى صوتك للسما
أنا عاوزة صرخه تروجنا
فى حاجات كتير بتهزينا
متخزنه جوة الملامح
محتاجه تخرج م المطارح
شوفت السما من حزنها
خنقت معالم نبضاها
رفضت دموعها تجفها
قول يا قلم وأوصف
وجع عاش من سنين
لحد أمته الروح هتنزف
ونعيش فى ذُل ومكسورين
لحد أمته نشوف حياتنا
متفتته رغم الأنين
إضرب بعزمك يا قلم
… إلغي الروتين
أصل المرض أصبح خطير
ولا عاد في نخوة ولا ضمير
راح الضعيف بين السطور
هرفع إيديا ل ربنا وهقول
أنصر يا رب الحق والمظلوم
نور لاُمه غاويه تبني جسور
…….. ……. ……. ……
بقلم/ هدي النحاس
مجلة نداء الرؤح لفرسان الكلمات 