السبع بنات .. رواية / رضالحسيني ج2(الحلقة15)
_ لولولي لولولي لولولي مبرووووووك ياأبلة زينب
_ عقبالك ياحبيبتي يامفيدة يارب
_ وأنا ياابلة زينب عقبالي كمان
_ وانتي كمان ياعيون قلب زينب عقبالك ياحبيبتي
_ ده مين ده اللي امه داعية عليه اللي هيكون من نصيبها يازينب ياختي ههههه
_ بقى كده ياست مفيدة .. طيب هتشوفي مين ده قريب
_ ماتزعليش ياحبيبة قلب بابا الحاج .. اختك بتهزر معاكي
..ودخلت زينب شقتها وسط زغاريد ماما ومفيدة وأهل أبيه فهيم .. وطبعا زغاريدي هههههههه
.. في هذه الفترة جاء طالب لبابا الحاج يستأجر منه الغرفة التي بالدور الأرضي خلف أحد محلات بيتنا .. وكان غير مصدق أن أحدا قبل السكن فيها .. وكان شابا هادئا قليل الكلام ويدرس بكلية التجارة .. وفرحت مفيدة كثيرا لوجوده معنا بالبيت ليذاكر لها وهي تدرس بالمدرسة التجارية الثانوية ..
وذات يوم كنت ومفيدة على سطح البيت نذاكر ووجدنا نُصحي يصعد ليذاكر أيضا وفرحت مفيدة كثيرا حين رأته
_ مساء الخير
_ مساء الخير ياأنسة
_ اسمي فريدة يااستاذ نُصحي
_ إيه ده انتي بتعرفيني .. أهلا بيكي حضرتك ساكنة هنا في البيت
_ لا أنا مفيدة وبابايا صاحب البيت
_ أنا أسف ماكنتش أعرف والله .. بأي سنة بتدرسي
_ بحاول أنسى أنا بدرس إيه والله
_ ليه بس كده .. مالها دراستك
_ بأولى ثانوي تجاري ومواد رخمة ومذهقاني
_ يمكن عشان دخلتيها غصب عنك بس .. مواد التجارة جميلة وممتعة جدا لوبتحبيها
_ والله انت طيب أوي ..سهلة إيه بس .. ده أنا بذاكرها من هنا وبتتبخر في ثواني من دماغي
_ لالالا أنا هقولك تعملي إيه عشان ماتتبخرش كده تاني
_ والله بجد ؟! طب قول قول وانقذني يلا بسرعة
_ أناهذاكرلك كل يوم شوية لولقيتك هنا عالسطوح زي دلوقتي
_ وهنا ليه بقى ماتيجي عندنا بشقتنا وتذاكرلي براحتك ..ماتتكسفش أبدا ده بابا الحاج بيشكر في أخلاقك جدا
_ بجد ؟! هو كلمكم عني .. ده من ذوقه بس
_ هي اللي بتجيلك دي والدتك .. بشوفها جايبالك حاجات من البلد معاها
_ لا والدتي متوفية الله يرحمها .. دي أختي الكبيرة أم مصطفى بتخلي بالها مني بعد أمي وطول عمرها شايلة همي
_ الله يرحم والدتك .. ويسعدك بأختك أم مصطفى .. باين بتحبك أوي
_ طول عمرها قريبة مني أوي وبحسها أمي التانية
طب يلا هنبتدي الشغل من النهاردة هنبتدي إيه .. شغل إيه يامفيدة
_ مش قلت هتذاكرلي
_ أه أه هذاكرلك .. ههههه هنبتدي الشغل يلا
_ أنا نازلة بقى يامفيدة عشان تركزوا براحتكم بقى في المذاكرة
_ استني استني .. اسمك إيه
_ أنا فريدة الفريدة .. اللي بفهمها بسرعة وانا بعيدة ههههه
_ بقى كده ياست فريدة .. طب مافيش شيكولاته
_ لالا كله إلا الشيكولاته .. مش هنطق بحااااجه
_ هههههه انتي من بتوع الشيكولاته .. خلاص من النهاردة ليكي عندي واحدة كبيرة
_ واحدة دي إيه .. كل يوم واحدة ياأبيه نصحي
_ حاااضر ياست فريدة كل يوم واحدة شيكولاته كبيرة مني
_ شفتي الكرم .. طلع شرقاوي أهو مش منوفي زي ماكنتي بتقولي ياست مفيدة ههههههههه
_ بقى كده .. طب امشي بعيد بقى عشان نذاكر يلا
_ إوعى تصدق اللي قالته ده يا استاذ نُصحي ماقلتش كده أبدا
_ مالك يامفيدة ماحصلش حاجة أنا منوفي فعلا هههههه
.. يلا بلاش نضيع وقت .. وريني معاكي كتاب إيه
_ كتاب المحاسبة .. مش فاهمة فيها حاجة خااالص
_ ماتقلقيش منها من النهارده .. المهم بس تركزي معايا وتسمعي الكلام
_ اطمن أنا مطيعة
_ انتي مطيعة ولا مفيدة .. ارسي على بر ههههههههه
إلى اللقاء مع الحلقة 16
مجلة نداء الرؤح لفرسان الكلمات 