شحن وتفريغ
احمد صبري
إحنا بتوع القدر
والكل رايح عندنا
آخر رحلة سفر
شحن وتفريغ هنا
عندنا ملاية كفن
مغسولة بقالها زمن
يجي الغلبان عليها
بيها يروح يندفن
و عشان انا منهم
خايفة اْموت زيهم
مش قادرة حتى اْتكلم
مخنوقة من حنقهم
ساعات النور بيقطع
أو يخلص الاْكسجين
مش كله يقدر يدفع
تمن باقي السنين
بقينا وقر الأجل
راكبين اْرخص عجل
والباب من ضرفتين
بيفوت ميت جمل
شاربين من نفس الخوف
شايفين مليون علامة
اْكل العيش والظروف
وكمامة فوق كمامة
مابين ماتتكلموش
وبين لبس الكلابوش
هنموت ساكتين جنابك
إحنا ناس مابيعيشوش
واْكيد العيب منينا
والف حسرة علينا
كترنا ومالينا البلد
يجيب منين يدينا
إحنا بتوع الكباري
والصور والكباريهات
والقهر مش إختياري
والرحمة ع الاموات
مجلة نداء الرؤح لفرسان الكلمات 