شد حيلك
———–د.خيري السلكاوي
حاوي حاوي…..
حاوي عَندي حاوي عَندك
كلنا فيها حواة
رغم عٍندي ورغم عٍندك
بكرة ينصرنا الإله
بس ادعي وانا هادعي
ربنا يهدي اللي تاه
واللي باع في يوم ضميره
واللي عربد في الحياه
واللي فكر يوم بإنه
محمي في سلطة وجاه
واللي رافق واللي نافق
لجل مايزود غناه
واللي غمى عينه عنا
لجل ما يسمعشي آاااه
المعادلة مش بسيطة
نقطة المية علينا استكتروها
والمعاهدات القديمة
انكروها
لجل م تضيع الحقيقة
بين نفوس جاحدة وحويطة
بين عقول عاملة عبيطة
بين رجول نسيت ..
تضاريس الخريطة
نسيت ان النيل دا روحنا
بيه بتتداوى جروحنا
وف ضفافه اتبنت
بالروح صروحنا
نسيوا إن النيل دة أمة
بس جه إبليس ودشن
بينا غمة
بين خوات بانين مبينهم
اعلى حيطة
والبراكين جوا منهم
مش نشيطة
المعادلة مش مربع
أو معين أو دواير
أو نهرول أو نطبع
والسلام من غير بشاير
و الطريق مسدود وفيه
القلب حاير
بين حروف للجر او بعض الضماير
حل الغاز المعادلة
مش مجادلة بين ضراير
حلها في كفة عادلة
في ميزان ع الكل داير
ايد في ايد تزرع وتصنع
والبقر يملا الحظاير
والعقول للعلم ترفع
تملا بيه الكون مناير
واللي ماشي يجري جامد
واللي عايم واللي طاير
هو مين غيري وغيرك
راح يصلح ….
خط سيري وخط سيرك
والحياة ايه غير تروس
مش راهيدورها غير
لفة من سيري وسيرك
لفة من سيري وسيرك
لفة من سيري وسيرك
مجلة نداء الرؤح لفرسان الكلمات 