رمضان برئ.
من ديوان / شبهتونا.
للشاعر / مصطفى فريد
من امتي كان رمضان غريب.
الغربة دايما فى النفوس.
والبعد عن نور الحبيب.
رمضان قريب من كل قلب
بينتشي وقت الصلا.
وبيختشي وجه الحبيب
رمضان برئ.
من كل أفعال البشر.
اللي انتشر فيه الحريق
من غير رجوع.
نهر الدموع.
ماعدش بيطفي اللهيب.
رمضان عمل.
زهد وايمان.
تراتيل عباده.
قرآنه للأبدان طبيب.
ولا عمره كان ابدا سهر.
مع تمثيليه مخنسه.
او فيلم داعر له بريق.
رمضان ونس.
مع الاحبة المشتاقين.
لحفظ قرآن ربنا.
ولحد فجره قائمين.
أهل الثقة.
وقت اللقا.
عصافير أمل.
جواها بصمة ربنا.
اهل الفراغ مساكين.
ساعة الفطار.
حسرة وندم.
تشهق وجع.
والجوع بيفرد سطوته.
على معده زي البير غويط.
والضمير قاطع نفس.
والفرس راكب عليه
فارس كفيف.
ورغيف بيشكي الجوع.
فى قلب ساحات الحرس.
وآدان بيدن مع جرس.
بيقول لنا رمضان كريم.
يا عطشانين شرب الكسل
رمضان عمل.
وطوق نجاة.
من كل زلات الحياه
رمضان كريم.
والأكرم من كل الجميع.
سبحانه رب الأكرمين.
مالك الملك المجيب.
لصوت دعاء المكروبين.
صلوا على طه الأمين.
٢٢
٥ تعليقات
أعجبني
تعليق
مجلة نداء الرؤح لفرسان الكلمات 