…. روشته للحياه ….
ما تيجوا نكتب روشتة للحياه
عامل ربك وسبحه في علاه
قول رأيك بصراحة متجاملش
لو جاملت هتبقي منافق ياولداه
خلي إللي عايز يخسرك يخسرك
لا هو ولا غيره بإيده يوم يكسرك
ولو الحق هيزعل قوله هتبقي ملك
دي الصحة والرزق والحياه بأمر الله
لو ظالم إوعاك في يوم تسقفله
أو تقرب منه تجامله وتطلب وده
في القبر كل واحد حسابه لوحده
لا هينفعك قربه ولا هينفعه الجاه
خليك علي طبعك وسيبك م الناس
لو راضي عنك ربك تبقي سيد الناس
يقولوا فيك ما يقولوا ده طبع الناس
دول شيلوا جحا وابنه الحمار ياولداه
صاحب ولا تحاسب يوم ولا تعاتب
صاحب الحساب ما كان عنك غافل
عمرك يومين يادوب هتروح وتسافر
لو اترحموا عليك م القلب الله عليك الله
لو حبك ربك كل البشر هتحبك
ويطرح الحب بساتينه جوا قلبك
صادق الصادق وخلي الاصيل جنبك
إبعد عن عبد المال وعاشق السلطة والجاه
خليك علي طبعك ولا يوم تغير طبعك
ولو حبيت خلي الحب دايما من قلبك
واوعاك والكره هيخلي السواد دربك
خليك مع الله ده عمرك وسترك وياه
واخر الكلام كلام إوعاك تكون نمام
إوعاك تحوش في قلبك غل وبيه تنام
إوعاك تبص لغيرك يغلبك شيطانك قوام
خليك مع الله هو الملاذ لو يوم فكرك تاه
…. أيمن بلال ….
مجلة نداء الرؤح لفرسان الكلمات 