( عن خدماتك أنا مستغني ) :
قالتلي إوعى تكون صدقت !!
إني عشقتك وإني وقعت
وإني يا واد دايبة ف دباديبك
مشغولة بيك انا طول الوقت
هو إنت ما بصيتش لنفسك ؟
ولا شفتش شَعرَك ولا لِبسَك ؟
نفسي تبص يا واد في مرآيه
هبلة مين حتبص ف وشك ؟
قلتلها انا واد غلبان
بس بصون العيش والعشرة
عمري ما أخون في الكون إنسان
ولا اغيَْر في اللون والبشرة
ولا زي شباب الايام دي
بيقضوها وكله يعدي
مصروفهم من بابِي ومامِي
انا باكل من عرقي وكدي
مش عاجبك شعري ولا هدومي ؟
ولا عاجبك منظري ولا شكلي
عمري ما الف بكلبين رومي
ولا كوافير نسوان يحلقلي
انا راجل من ساسي لراسي
وبحافظ على اهلي وناسي
واكِل على طبلية ابويا
ولخيره عمري ما أكون ناسي
انا عمري ما أفرط في مبادئي
أهم سماتي أمانتي وصدقي
وزي ما بارعى انا حق الغير
مش بتنازل يوم عن حقي
مين صور لك بقى يوم إني ؟
مغرم بيكي قاعد مستني
روحي يا حلوة سيبيني ف حالي
عن خدماتك انا مستغني
روحي يا حلوة سيبيني ف حالي
عن خدماتك انا مستغني
بقلمي الشاعر جمال زكي عينر
٣Tghred Ahmad، فهدالصحراء الجرئ وشخص آخر
٦ تعليقات
أعجبني
تعليق
مجلة نداء الرؤح لفرسان الكلمات 