( تخاريف ) :
لقيت نفسي في يوم تايهه مراكبها
ماهش عارفة ده عيب الموجة او عيبها
اتاري الموجة واخداها في دوامة
بحثت كتير على نفسي كتير ياما
لا انا بالقاها ولا بالقى حبيب عمري
ولا بوصل لشط امان يصون عمري
وموجة تاخدني ورا موجة
ما بين الميه وسمايا
مانش لاقي في طوق لنجاه
وخوف الدنيا جوايا
وايه نابني ؟
ما اهو سابني
ولا داري بايه صابني
ويدرى منين ؟
ما دام عايش مابين شطين
في مركب وحده يتمخطر
ما بين الاتنين
وانا غرقان وتاه فكري في لحظة موت
في لحظة رعب هزتني وجو سكوت
وبين الفكرة والفكرة
وأملي إني اعيش بكره
لقيت الميه واخداني
لشط بعيد ورمياني
وفقت !!!!!
وقلت آه ياني
أتاري كل دي احلام
وتخاريف جاتني جوه منام
واتاري حبيبي هنا جنبي
وحاطط إيده على قلبي
وبيقوللي صباح الخير
سلامتك يا حبيب قلبي
وبيقوللي صباح الخير
سلامتك يا حبيب قلبي
بقلمي الشاعر جمال زكي عينر
أعجبني
تعليق
مجلة نداء الرؤح لفرسان الكلمات 