استاقل لعقل!
(زجل مغربي)
استاقل لعقل فزمانا…
مشى وتساخر اللور
كلشي ولى مجرور
هاذا مرض صابنا…
ما ينفعنا فيه بخور
حال النبيه مبهدل…
ولمهور عاد ميسور
سلمنا فخلاق جدودنا…
وتغرينا بكلام الزور
حكايتي ليكم وصاية…
لا تزرعها فأيام البور
كون حكيم وفاهم…
وفرق الظلام من النور
لعقل ميزة الخالق…
لا تخربو تولي معذور
لبهايم ترعى فلفدادن…
نظام الله مفطور
العاقل بعقلو تالف…
يتعامل بحال المسحور
الله يلطفنا من غمامة…
فيضان كلو ضرور
لمناوي تلقاها حاضرة…
والنية ولات معيور
لخيرات كلها فاسدة…
والغشاش اصبح مستور
ݣالو الثيقة تعود ندامة…
والكل منها منذور
القيم مشات وضاعت…
وثور يتساخر اللور
ما بقى ما يستر عيبنا …
كلشي ولى منشور
-بقلم: محمد دومو
-مراكش/ المغرب
١ارق ملاك
تعليقان
أعجبني
تعليق
إرسال
مجلة نداء الرؤح لفرسان الكلمات 