موالى
انا موالى على كيفى بيتغنى
ولو سال الكلام فياض وله معنى
انا على حسى باستعجب..
فاقوم أكتب كلام يعجب
يصبح كلامى كفوف..
تهنن ياما وتطبطب
ولو عينها فى مره تشوف..
كلامى منه تستغرب
مره تقول بحبها ليه
ومره تقول..
ايه فيها انا حبيت
ومره تشوفنى توأم روح
ومره تشوفنى مناخوليا أو اتجنيت
ومره تبتسم ساكته على كلمه
ومره تلومنى لو شعرى فى يوم لامها
ومره تحس انى بجد بفهمها
ومره تشك فى كلامى..
لكن تسكت ولا تقولها
ومره يصير كلامى يقين
تشوفه خيال ..
هايتخلى فى يوم عنها
شيطان الحلم فى الجنه..
عشان يطردنا يوم منها
وانا ماسك فى ديل حلمى على كيفى
وعينك فكره ولاده على كيفى تزور طيفى
فتفضل فكرة الموال كلام رحال
هايرسى فى مره على شطك
وهاتشوفى
كلام حبى
ماكانش فى مره بس كلام عشان يتقال
ولا حكيوه ملتوته
ولا كله خيال فى خيال
انا رحال
فى سكة حبك القاسيه
بخطوه عامله موزونه ماهيش راسيه
بتتطوح فتتحدى
بتتشقلب بيها الدنيا تقوم مده
ماهى حبت سكتك قالت انا مقايسه
فايوم ماحزن على بعدك..
أقوم أكتب
ولما افرح بقربك منى لو ثانيه..
أروح أكتب
ولما يتخنق نفسى واقوم مفزوع
اكيد باكتب
ولما تشدى على ايدى بكلمه حنينه باكتب
ولما تسترى عيوبى عشان فاهمه
باسرح فيكى وانا باكتب
ولما تحجمى وجودى عشان عاصيه
باوجد نفسى وياكى وانا باكتب
انا بأكتب ومش باكدب
باصدق كل احاسيسى وباستغرب
بألف ياما فى عيونك ٢٠٠ موال
وهما يقولوا الهوى غلاب
يقول قلبى الهوى رحال
يا شوق قلبى من الترحال
هواكى سراب هواكى وقت ويعدى !!
هواكى هايتنسى ببعدى !!
هواكى صعب يتحقق على أرضى !!
ده احساسك
واحساسى الهوى موال
بيتكرر
يسكر طعم دنيتنا مهما الطعم بيمرر
يدوب فينا كما السكر
يبين حته جوانا لما فيها بينور
يصبر صبرنا المشتاق..
مهما الوقت يتأخر
ولو قرر
يخلينا فى يوم مجانين بنتجنن
ولو عايز يخلينا ملايكه فسده أو شياطين
على كيفه بنتفنن
ونتشكل زى ما عشقنا يسمح يكون عايز
ونفضل نرسم التأكيد على كلمة فى يوم جايز
ماهو جايز
ومين كان قال فى حاجه محال
عشقتها يوم ما بصت لى
ولمحتنى باروح وباجيها واسألها فى اى سؤال
واوريها كلام كاتبه
يأكد ليها احساسى وابص بعيد
تقول بكاش تقول محتال
مافيش فى هواها حاجه محال
انا موال باعيد نفسى
وباحبس فى الدموع نفسى
عشان نفسى
فى وقت الشده احتاجك الاقيكى
واعيش ليكى واموت فيكى
واحكى لك واغنيكى
كما موال
بيجى كل يوم ع البال
ويغفى فى حضنى وعنيكى
ويبدأ يومه لعنيكى
يعيش ليكى يموت فيكى
ماهيش فارقه
ما ياما داق من الحرقه
وبرضه غنى ١٠٠ موال
٢٤٢٤
٣٢
١٣٥
أعجبني
تعليق
مشاركة
مجلة نداء الرؤح لفرسان الكلمات 