………نفسي في طاقة نور
يعدي الزمن ويدور
وبيني وبينك بحور
والحلم عالشط مستني
ف عز الضلمة طاقة نور
وف سجنك هوايا براح
سيبك م العمر اللي راح
بس خلي الفرح يزور
ياحلوة بطبع الليل والنيل
ياضحكة كانت غنا ومواويل
يابسمة فجر وصوت تراتيل
ليه رحاية الحزن فيكي تدور
لا يوم فارق ضحكتك أهلك
ولا كان الحزن يوم طبعك
حبيبتي استني علي مهلك
بلاش تخلي البكا فيكي بحور
عطشان وسر العطش فيكي
ولإمتي الخوف راح يرويكي
فين ياحبيبتي زمن غناويكي
وامتي تتبدل ضلمتك بالنور
أنا عاشق وعشقك غية
أنا راهب في حبك يابهية
بس امتي راح تبقي ليه
وامتي يهل تاني فيكي النور
….. أيمن بلال …
مجلة نداء الرؤح لفرسان الكلمات 