شلت يا ولدى اهو الهدمتين
هتودينى على فين
عند اختك وجوزها الغريب
اللى قوت يومه مقسوم
على ابوه الضرير وعلى نفسه
هشيله ازاى هم على همه
ده اختك عجزت من بدرى
وهى الصغيرة يا قلبى
ولا عند اخوك الكبير
اللى باعنى زمان بالرخيص
واشترى مراته بالغالى
ونسى يعنى ايه امه
كان اول فرحتى وغلبى
ياما حلمت بيه يكون ضهرى
قلت الكبير يسند ضهرى
يوم ما راح الكبير لقبره
استنى اقولك ضنايا
الحل اهو من عندى
على الجبل ودينى
وسط الدياب خلينى
اعيش اموت
والفرق ايه يا عمرى
الديب ارحم من البشر ساعات
بس نصيحة وخدها منى
خليك فاكر المكان
ولو نسيته بكره هتوصله
لما يجى الدور
ما هو الديب قاعد مستنى
يبص على البشر مستغرب
مين بياكل مين يا ترى
ولدى
الشيبه مش عيبه
ضاع العمر عليكم
والفرح كان ليكم
يدور الزمان ويلف
العظم ينخره السوس
النضر يروح من همى
سبت التعليم كد من بدرى
من الكتاب يعنى
وسهرت ليكم ياما اعلم
يحرم عليا النوم
طول ما انتم جنبى
اخوك سخن يا وعدى
انت بتذاكر من بدرى
اختك نامت زعلانه يا قلبى
كبرت والضهر انحنى ومال
مديت ايدى مين هيعوضنى
ملقتش غير عصايتى
اتسند عليها وشايفه دمعى
خلاص شياله الهدمتين
كفايه كلام وحديت
مش هيرجع اللى فات
ولا هيغير اللى جاى
يا ولدى
شريف القناوى ٣ / ٢٠١٧
حركّ الماوس لمشاهدة الصورة في وضع ثلاثي الأبعاد
كل التفاعلات:
٤٤
مجلة نداء الرؤح لفرسان الكلمات 