للخلف دُر
ارجع بقى كِفاياك يا قلبي
عذبتني للخلف در
ورطتني وسقتني مر
كان إيه لزومه تتعبني يعني
حزن وضنا عليك تجر
دلوقتي جاي بتقوللي خدني
قلبك انا فيّا انت حر
مش قلتلك ده العشق خَيَّه
اياك تسيبه ف عنيك يغر
كت إربِتَك مليانه ميّه
دلوقتي ماشي وعليك تخر
بحر الهوى امواجه عاليه
لو تنزله ما هتلقى بر
غدار اوي ورياحه عاتيه
ونوِّته مالهاش مفر
بركان ألم اوجاعه حاميه
وثورته ف القلب جمر
جرِّيت دموعي من الندم
ومن الاهات
سهرت رمشي
بس اوعدك انسى الألم
كل اللي فات
كما لو ماكانشي
على شرط تمشي
ف طوعي يا بني
ومن سكات
ماتسيبشي عِشي
ولا تعصى ليا اى امر
للخلف در
بقلمي/ خالد جمال ٩/٦/٢٠٢٤
أعجبني
تعليق
إرسال
مجلة نداء الرؤح لفرسان الكلمات 