الاسم رضا ابو شنب
قصيدتي الجديدة
(المقابر)
لما عديت على المقابر
قلت ادور علي الصحاب
قلت فين أحمد وجابر
واللي شعره بينا شاب
****؛
قلت اقلب في الدفاتر
وابقي أعلم على الغياب
ياما كنا زمان نذاكر
ياما قطعنا الكتاب
عمري ماانسي ولسه فاكر
لما كنا في يوم شباب
كنت بلعب ويا شاكر
والعروسة تكون رحاب
كنا نجري من العساكر
نستخبي من ايهاب
لما يجي يقول تذاكر
كنا نطلع بالجواب
كنا بندوس على المخاطر
كنا بنعدي الصعاب
واللي يعمل فيها شاطر
كان بياكل من التراب
كنت بسمع عم صابر
لما يحلم بالكباب
كان يقول لو كنت قادر
كنت اجيبه علي الحساب
الغلابه و الاكابر
كلهم جوه التراب
اللي كان في الدنيا نادر
واللي عيشته كات هباب
الاسامي في المحاضر
والعمل جوه الكتاب
واللي كان في الناس يتاجر
بكره يشبع من العذاب
كلنا هنقول يا ساتر
لما يتشال الحجاب
ربنا غفار وقادر
ربنا هو اللي جاب
والإسامي على المقابر
كل اسم وجنبه باب
اللي غايب واللي حاضر
كله يستنى الحساب
كله يستنى الحساب
مجلة نداء الرؤح لفرسان الكلمات 