( لما تحب تعيش الدور ) :
لما تحب تعيش الدور
ماتجيش عندي تلف تدور
إبعد عني وسيبك مني
روح على غيري اتنطط غور
إوعى ف يوم ياخدك تفكير
إنك حاجة وشان كبير
إوعاك تنسى وتنفش ريشك
نسمة هوا تاخدك وتطير
ما تهيَّصش ولم الدور
تتعصب وتقوم منطور
ياما كتير صعاليك ضربوك
خلي بقى الطابق مستور
روح اتنطط ع اللي باعوك
ساعة الجد راحوا ونسيوك
واما زعلت وجيت تعاتبهم
سبوا ولعنوا ابو اللي جابوك
وحياة ربي لتبعد عني
شكلك كده مش عارف إني
لو حطيتك يوم في دماغي
جنب السور هتلف تغني
راح تصرخ وتقول للناس
انا عقلي راح مني خلاص
تستاهل جبته إنت لنفسك
علشان معدوم الإحساس
لو إنسان بتراعي ضميرك
عمر ما كنت احتجت لغيرك
ولا كانوا في الطل رموك
بعد ما أكلوا ونهبوا ف خيرك
ما تجيش بقى عندي وتتنطط
وتخرف بكلام وتهلفط
روح يا حبيبي الله يهديك
وما ترجعش ألا ما تتظبط
روح يا حبيبي الله يهديك
وما ترجعش الا ما تتظبط
بقلمي الشاعر جمال زكي عينر
تعليقان
أعجبني
تعليق
مجلة نداء الرؤح لفرسان الكلمات 