( أنا مش حافِظ ) :
بكتب شِعر كتير وقليل
لكن للأبيات مش حافظ
أنا لو حافظ
كل اشعاري وكل قصايدي
في الكشاكيل او جوه محافظ
أنا مش حافظ
بس محافظ
على تقاليدنا وأي عادات
وقريت لأبو نواس والجاحظ
واقرا كتير في الحب ساعات
لكن مشكلتي ما بحفظشي
وتتوه مني كتير كلمات
أنا مش حافظ
بس أنا فاهم
فاهم معنى الوفا للغير
وبشارك في الشدة وأساهم
لازم أمِد الإِيد بالخير
أصل الحافظ ممكن ينسى
ممكن يظلم
ممكن يقسي
حفظه ف ضل هواه بيطير
لكن الفاهم
زي العالِم
عارف البحر وعارف المرسى
يعرف بَرُّه قبل ما يرسى
عمره ما يمشي بدون تفكير
أنا مش حافظ
بس بحافظ
على مواعيدي وأي عهود
بحفظ عهدي وصاين ودي
بوصِل رَحِمي وقلبي ودود
أنا مش حافظ حرف وكلمة
بس أمين لو كان فيه قسمة
بحفظ حق الغير وبصونه
عندي ضمير وباراعي الذمة
أنا مش حافظ
علشان ربنا هو الحافظ
لكن حافظ أركان ديني
وآخُد من قرآننا مواعظ
لكن حافظ أركان ديني
وآخُد من قرآننا مواعظ
بقلمي الشاعر جمال زكي عينر
٢٢
تعليقان
أعجبني
تعليق
إرسال
مجلة نداء الرؤح لفرسان الكلمات 