====================اضحك=====- *************************************************
اضحك
عشان الضحك غالى فى الزمن الرخيص
اضحك
وانسى قوانين الرصيف
وانسى انك تحت عجلات ظلمهم كنت الضعيف
اتسند على ضى قمرة
واجرى ع الفجر الوليد
خد من الشمس عبرة
واتفرد فى وش اليأس العنيد
الحياة عاوزاك شديد
تفوت فى المحن كما الحديد
اضحك ..
قبل ما يبيعوا عمرك من جديد
وما تلقى حتى حق الكفن
ولا تعرف تتسند على اى ايد
اضجك
سرقوا منا طعم الحياة
فبلاش يسرقوا حق الحياة
اضحك
انت من غير ضحك متهم
رتوش فى صفحة رسموها لايام الممات
اضحك ….
استلف من قلب قلبك ابتسام
مد ايدك اتشعلق فى قلب حبك
وطير فى براح الامنيات
انت كنت فى يوم حكاية تتحكى فى الامسيات
اوعى تكشف ستر روحك
غطها وغطى عينك من مر نوحك
اعرف ان الدنيا لسه بتستنى بوحك
اضحك واخفى جنوحك
عن طريق الحب والامل المباح
اضحك واستنى الصباح
=====================محمد عبد المقصود داود
مجلة نداء الرؤح لفرسان الكلمات 