هو الزواج ***
بالنية
لا بالاعجاب والزواق …
عطيني نعطيك والتخراج
بل مودة ورحمة
حلاوتو نضج وعفة
وفق شرع الله …
وصاحب المعراج
بل طرافو فضيلة وطهارة
لا تشلهيب والغاية محبة وبشارة
طريقو مضوية وضاوية …
فلا تبرهيش لا عواج
ه الزواج
وسيلة ما يجي لغيث وتكون لعمارة
تريكة لحلال والصالحات تجارة
لقنعة والصفا راس مال…
ولوفا وزيونية الفعل تاج
فعنداك تبع الفلوطي
تطيح في لحرطاني والعنطوطي
كثر همك وتذوبك لحسرة ولمواج
عنداك لمكياج
كلام لحلو وكلها يغني بغناه
لا صدق من البدية وكلها يزعت بهواه
هذا بجمالو ومالو وهلو وحبابو
وهذا عليك قاد يقطع لبحر وعبابو
ينعسك على الوهم وفي لغد تولي طاج
فيا صاحبي من لحكيم سمع لوصية
ما تلهى على حد اختار بحب وبالنية
ؤ خليني من السلعة البايرة …
تقاد وتوكل واطلب الله الفراج
بصح احبيبي دنيا بالذياب عامرة
شد انت في الصح وخلي الكافلة سايرة
نقي تشرب …
ول توكل على الله ما يحتاج
بل ما توقف في طريقو نواعر
دعاة الزنا والجوف الماكر
ذوك ل بغاو السفينة تغرق …
ما سرهم غ لكرباج
في دين الله سواري الزواج ثابتة
كلشي باين فعنداك تديك اساطير تاتا
دعاة البهيمة …
ول عاد ضربتو لفيقة وعجبو لخماج
فيا ازهار الحال ردوا البال
ماناقصك غير لمعقول وتفك من لغلال
سلاسل التبعية فحنا بنادم ماشي بغال
ديرو المروة صولجان
لا كذوب لا بهتان
تقاد الحياة …
وبالنضج يتقادك لمزاج
اما ذوك اصحاب بلابلا وشلى هضرة
قطع معهم تنجح وتسعد وتبرا
ما تهزك مظاهر ولا يجليك ما كياج
الخالق سوى فقدر
القران مقدس ومطهر
ووفق لحلال وشرع الله وصاحب المعراج
هو الزواج
ما هو بيع ما هو شرى
نقاء وطيبة ولوفا والعشرة
تقدير وحشمة وعلى جبين الصالحين…
وشاح ووسام وهمة وتاج
***الشاعر والزجال: أحمد الكندودي ***المغرب
كل التفاعلات:
٣٣
مجلة نداء الرؤح لفرسان الكلمات 